Mae Anthem. Cronfa Gerdd Cymru wedi cyhoeddi eu bod bellach yn derbyn ceisiadau ar gyfer ail gylch Cronfa Atsain, sy’n cefnogi mudiadau cerddoriaeth ieuenctid i fynd i’r afael â rhwystrau i gerddoriaeth ar gyfer pobl ifanc yng Nghymru.

Lansiwyd Cronfa Atsain yn gyntaf ym mis Rhagfyr 2021, ac mae wedi dyfarnu dros £120,000 i 15 o sefydliadau cerdd, gan weithio ar y cyd â dros 2000 o bobl ifanc ledled Cymru. Yn ogystal, crëwyd rhwydwaith o’r holl fuddiolwyr i hwyluso fforymau i rannu arferion gorau a hybu’r arfer o gydweithio, gan sicrhau y gall pobl ifanc fanteisio’n llawn ar gerddoriaeth.

Dywedodd Rhian Hutchings, Prif Weithredwr Anthem:

“Rydyn ni eisoes yn gweld pobl ifanc yn cysylltu gyda cherddoriaeth mewn ffyrdd newydd o ganlyniad i brosiectau a ariannwyd gan gylch cyntaf Atsain. Mae’r sawl a dderbyniodd ein grantiau yn gweithio gyda phobl ifanc o bob oed, gan eu helpu i fagu hyder, archwilio eu creadigrwydd a dod o hyd i lwybrau at yrfaoedd posibl yn y dyfodol.  Rydym wrth ein boddau o allu cynnig cymorth i fwy byth o bobl ifanc yn yr ail gylch hwn o’r gronfa. Diolch o galon i’r cyllidwyr, Youth Music a Llywodraeth Cymru, am barhau i gefnogi Atsain.”

O 1 Medi 2022 ymlaen, bydd modd i sefydliadau cymwys wneud cais am hyd at £10,000 er mwyn eu helpu i gyflwyno prosiectau cerdd penodol i bobl ifanc yng Nghymru, gan eu cynorthwyo i fynd i’r afael â rhwystrau penodol rhag ymgysylltu drwy amgylchiadau bywyd, materion daearyddol, hunaniaeth neu gefndir.

Dywedodd Matt Griffiths, Prif Weithredwr Youth Music: 

“Mae’n wych gweld Atsain eisoes yn gwneud mynediad yn fwy cydradd i bobl ifanc yng Nghymru allu creu a dysgu cerddoriaeth ac ennill incwm drwy gerddoriaeth. Gobeithio y bydd mwy o brosiectau arloesol yn cael eu hysbrydoli i wneud cais am arian yn y cylch nesaf.”

Mae Anthem yn credu bod cerddoriaeth yn ffordd bwerus i helpu pobl ifanc i ddatblygu hunan-barch, gwneud cysylltiadau ag eraill a lleddfu straen. Gall fod yn yrfa hefyd. Fodd bynnag, mae llawer o bobl ifanc yng Nghymru yn methu â chael profiadau cerddorol am eu bod yn byw yn yr ardal ddaearyddol anghywir, neu mewn ardal o amddifadedd cymdeithasol uchel, neu’n cael eu cau allan ym mha bynnag ffurf. Mae cyllid Anthem yn caniatáu i sefydliadau greu prosiectau newydd mewn cyd-destunau penodol er mwyn mynd i’r afael ag anghenion pobl ifanc a’r rhwystrau sy’n eu hwynebu.

Meddai Rebecca Rickard, Rheolwr Rhaglen Atsain:

“Rydyn ni’n teimlo’n gyffrous iawn i weld sut bydd y sawl sy’n derbyn ein grantiau yn gweithio mewn partneriaeth â sefydliadau o sectorau eraill a all eu helpu i ddarparu’r budd mwyaf i bobl ifanc. Rydyn ni’n croesawu partneriaethau rhwng sefydliadau sy’n canolbwyntio ar gerddoriaeth, ond hefyd ieuenctid, cymuned, anabledd, iaith, tlodi, hil a mwy. Drwy bartneriaethau y mae sefydliadau’n cael gwell dealltwriaeth o’r rhwystrau y mae pobl ifanc yn eu hwynebu, a sut i’w chwalu.”

I gael rhagor o wybodaeth a gwneud cais ar-lein, ewch i anthem.wales

Rhaid derbyn ceisiadau erbyn Hydref 3 2022. I gael ateb i bob cwestiwn am Gronfa Atsain, ymunwch â gweminar Anthem am 10am ar 13 Medi – cofrestrwch fan yma.